បន្ទាយមានជ័យ: បុរសមានពិការភាពម្នាក់បានបំផ្ទុះគ្រាប់បែកធ្វើអត្តឃាត់សម្លាប់ខ្លួនឯងនៅក្នុងខ្ទមស្លាប់យ៉ាងអាណោចអាធម័។ ករណីបំផ្ទុះគ្រាប់បែកធ្វើអត្តឃាតកើតឡើងកាលវេលាម៉ោង៤:១០នាទីព្រឹក ថ្ងៃទី៣១ ខែសីហា ឆ្នាំ២០២១ នៅភូមិរង្វាន ឃុំណាំតៅ ស្រុកភ្នំស្រុក ខេត្តបន្ទាយមានជ័យ។

លោក ប៉ិក គឹមហ៊ាក់ អធិការស្តីទីស្រុកភ្នំស្រុក បានឲ្យដឹងថាជនររងគ្រោះឈ្មោះ ម៉ី កូត ភេទប្រុស អាយុ៥៤ឆ្នាំ ជនរងគ្រោះធ្លាក់ខ្លួនឈឺពិការដើរមិនរួចជាង១០ឆ្នាំមកហើយ (អតីតធ្លាប់បានធ្វើជាទាហាន) រស់នៅតែម្នាក់ឯងគ្មានប្រពន្ធកូន។ ក្រោយពីកើតមានករណីបំផ្ទុះគ្រាប់បែកធ្វើអត្តឃាត កម្លាំងនគរបាលបានបង្កើតក្រុមការងារហ៊ុព័ទ្ធកន្លែងកើតហេតុ និងក្រុមការងារចុះធ្វើកោសល្យវិច្ច័យ ដែលមានសមាសភាពចូលរួមពីគ្រប់ភាគីពាក់ព័ន្ធ។

តាមការបញ្ជាក់ពីលោកវរសេនីយ៍ឯក សួន សុត្ថារ័ត្ន បានឲ្យថាតាមការត្រួតពិនិត្យ ឃើញវត្ថុតាងមាននៅនឹងកន្លែងកើតហេតុរួមមាន គម្របគ្រាប់បែកមានពណ៍ខៀវម៉ាក (មីនី) ចំនួន០១, កន្លាស់គ្រាប់បែកធ្វើពីដែកមូលចំនួន០១ និងខ្លួនសពមានស្នាមរបួសជាច្រើនកន្លែង។

ផ្អែកលើការពិនិត្យយ៉ាងល្អិតល្អន់ និងយកចិត្តទុកដាក់របស់មន្រ្ដីជំនាញ និងការសន្និដ្ឋានរបស់លោកគ្រូពេទ្យកោសល្យវិច្ច័យបញ្ជាក់ថាឈ្មោះ ម៉ី កូត បានបំផ្ទុះគ្រាប់បែកធ្វើអត្តឃាតសម្លាប់ខ្លួន ពិតប្រាកដមែន មិនមែនជាករណីឃាតកម្មទេ។ ហើយការធ្វើអត្តឃាតខ្លួននេះសង្ស័យតូចចិត្តនឹងខ្លួនមានពិការភាពយូរឆ្នាំរស់នៅម្នាក់ឯង។ មួយវិញទៀតគ្រាប់បែកដែលធ្វើអត្តឃាតនោះសង្ស័យគាត់លាក់ទុកកាលពីធ្វើទាហាន មកម្លេះដោយគ្មានអ្នកណាបានដឹង៕